ಕನ್ನಡಿ ಮನೆಯೊಳಗೆ ಮಾಣಿಕ್ನ ಕಡೆಯವರ ಪ್ರವೇಶದ ಶಬ್ದ ಕೇಳಿಸುತ್ತಿದ್ದಂತೆ ಕೃಷ್ಣನಿಗೆ ಆತಂಕ ಹೆಚ್ಚಾಯಿತು. ಸುತ್ತಲೂ ಕನ್ನಡಿಗಳಿದ್ದವು, ಮತ್ತು ಪ್ರತಿಬಿಂಬಗಳೇ ದಾರಿಯನ್ನು ಮುಚ್ಚಿದ್ದವು. ಅವನಿಗೆ ಸಿಕ್ಕಿದ್ದ ಪುರಾತನ ಪೆಂಡೆಂಟ್ ಅವನ ಕೈಯಲ್ಲಿತ್ತು. ಅದು ಕೇವಲ ಆಭರಣವಾಗಿರಲಿಲ್ಲ, ಅದರ ತೂಕ ಮತ್ತು ವಿಚಿತ್ರ ವಿನ್ಯಾಸದಿಂದಾಗಿ ಅದು ಒಂದು ರಹಸ್ಯದ ಸುಳಿವು ಎಂದು ಕೃಷ್ಣನಿಗೆ ಅನ್ನಿಸಿತು.
ಇಲ್ಲಿಂದ ಬೇಗ ಹೊರಗೆ ಹೋಗು ಎಂದು ಮನಸ್ಸಿನಲ್ಲಿಯೇ ನಿರ್ಧರಿಸಿದ ಕೃಷ್ಣ, ತಕ್ಷಣ ಗೋಡೆಯ ಮೇಲೆ ಕಾಣಿಸಿದ ರಹಸ್ಯ ಕೋಡ್ ಅನ್ನು ನೆನಪಿಸಿಕೊಳ್ಳಲು ಪ್ರಯತ್ನಿಸಿದ. ಕೋಡ್ ಹೀಗಿತ್ತು. '5 - A - 9 - D'.
ಕೃಷ್ಣ ಪೆಂಡೆಂಟ್ ಅನ್ನು ತಿರುಗಿಸಿ ನೋಡಿದಾಗ, ಅದರ ಹಿಂಭಾಗದಲ್ಲಿ, ಮೈಕ್ರೋಸ್ಕೋಪ್ನಿಂದ ನೋಡಿದಂತೆ ಕಾಣುವ ಪುಟ್ಟ ಅಕ್ಷರಗಳು ಮತ್ತು ಸಂಖ್ಯೆಗಳಿದ್ದವು. ಆತ ತಕ್ಷಣ ಕೋಡ್ನೊಂದಿಗೆ ಪೆಂಡೆಂಟ್ ಅನ್ನು ತಾಳೆ ಹಾಕಿದಾಗ, ಅದರಲ್ಲಿ '5' ಮತ್ತು '9' ಸಂಖ್ಯೆಗಳಿದ್ದವು, ಆದರೆ 'A' ಮತ್ತು 'D' ಅಕ್ಷರಗಳಿರಲಿಲ್ಲ. ಆಗ ಕೃಷ್ಣನಿಗೆ ಅನಿರೀಕ್ಷಿತವಾದ ಒಂದು ಯೋಚನೆ ಬಂತು. ಆ ಕನ್ನಡಿಗಳು ಕೇವಲ ದಾರಿಯನ್ನು ಮುಚ್ಚುವುದಕ್ಕಲ್ಲ, ಅವು ಸತ್ಯವನ್ನು ತಿರುಚಿ ತೋರಿಸಲು ಇಟ್ಟ ಕನ್ನಡಿಗಳು. ಆತ ತಕ್ಷಣವೇ ರಹಸ್ಯ ಕೋಡ್ನ ಅಕ್ಷರಗಳನ್ನು ಕನ್ನಡಿಯ ಮೂಲಕ ಓದಲು ಪ್ರಯತ್ನಿಸಿದ. 'A' ಯು ಕನ್ನಡಿಯೊಳಗೆ 'V' ಯಂತೆ, ಮತ್ತು 'D' ಯು 'B' ಯಂತೆ ಕಾಣಿಸಿತು.
ಕೃಷ್ಣ ಆ ಕೋಡ್ ಅನ್ನು ಹೊಸದಾಗಿ ನಿರ್ಧರಿಸಿದ '5 - V - 9 - B'.
ಕೃಷ್ಣ ಆ ಕೋಡ್ ಅನ್ನು ಬಳಸಿ, ಪೆಂಡೆಂಟ್ ಅನ್ನು ಕನ್ನಡಿಯ ಎದುರು ಹಿಡಿದು, ಆ ಕೋಡ್ನಲ್ಲಿ ಸೂಚಿಸಿದ ಸಂಖ್ಯೆಗಳು ಮತ್ತು ಅಕ್ಷರಗಳನ್ನು ಜೋಡಿಸಿದ. ಧಿಡೀರನೇ, ಕನ್ನಡಿಗಳಲ್ಲೊಂದು ಬಾಗಿಲಿನಂತೆ ಸದ್ದು ಮಾಡದೇ ನಿಧಾನವಾಗಿ ಒಳಕ್ಕೆ ತೆರೆದುಕೊಂಡಿತು. ಕೃಷ್ಣ ತಡಮಾಡದೆ ಆ ಬಾಗಿಲಿನೊಳಗೆ ಪ್ರವೇಶಿಸಿದ. ಹೊರಗೆ ಮಾಣಿಕ್ನ ಕಡೆಯವರ ಬೂಟುಗಳ ಸದ್ದು ಹತ್ತಿರವಾಗುತ್ತಿತ್ತು.
ಕನ್ನಡಿ ಮನೆಯ ರಹಸ್ಯ ಬಾಗಿಲಿನಿಂದ ಹೊರಬಂದ ಕೃಷ್ಣ, ಒಂದು ಕತ್ತಲೆಯಾದ ಕಿರಿದಾದ ದಾರಿಗೆ ಕಾಲಿಟ್ಟ. ಆ ದಾರಿ ಒಂದು ಸಣ್ಣ, ಹಳೆಯ ಗೇಟ್ ಬಳಿ ಕೊನೆಗೊಂಡಿತ್ತು. ಆತ ವೇಗವಾಗಿ ಹೊರಬರಲು ಪ್ರಯತ್ನಿಸುತ್ತಿದ್ದಾಗ, ಆ ಕಿರಿದಾದ ದಾರಿಯ ಒಂದು ಕಂಬದ ಬಳಿ ಒಂದು ಸಣ್ಣ ಮೆಮೊರಿ ಚಿಪ್ ಸಿಕ್ಕಿತು. ಅದು ಈ ಹಿಂದೆ ಅನುಳ ಅಣ್ಣನ ಕಡೆಯವರಿಂದ ಸಿಕ್ಕ ಟೋಕನ್ನಂತೆಯೇ ಒಂದು ಸುಳಿವಾಗಿತ್ತು. ಕೃಷ್ಣ ಆ ಚಿಪ್ ಅನ್ನು ತೆಗೆದುಕೊಂಡ. ಆತ ಗೇಟ್ನ ಹೊರಗೆ ಕಾಲಿಡುತ್ತಿದ್ದಂತೆ, ಒಬ್ಬ ಅಪರಿಚಿತ ವ್ಯಕ್ತಿ ಅವನ ಮುಂದೆ ನಿಂತಿದ್ದ. ಆತ ಸಂಪೂರ್ಣ ಕಪ್ಪು ಉಡುಗೆಯಲ್ಲಿ ಇದ್ದನು.
ನಿನ್ನ ಧೈರ್ಯವನ್ನು ಮೆಚ್ಚಿದೆ, ಕೃಷ್ಣ. ನೀನು ಬಲೆಯಿಂದ ತಪ್ಪಿಸಿಕೊಂಡಿದ್ದೀಯಾ.
ಕೃಷ್ಣನಿಗೆ ಆ ವ್ಯಕ್ತಿಯ ಧ್ವನಿ ಕೇಳಿ ಶಾಕ್ ಆಯಿತು. ಇದು ಬೇರೆ ಯಾರದ್ದೂ ಅಲ್ಲ, ಬಾರ್ನಲ್ಲಿ ಕರೆ ಮಾಡಿ ನಿನ್ನ ಹುಡುಗಿ ಬದುಕಿದ್ದಾಳೆ ಎಂದು ಹೇಳಿದ್ದ ಅದೇ ಅನಾಮಿಕನ ಧ್ವನಿ.
ನೀನು ಯಾರು? ನೀನೇನಾ ಆ ಕರೆ ಮಾಡಿದ್ದು? ಕೃಷ್ಣ ಪ್ರಶ್ನಿಸಿದ.
ಅನಾಮಿಕನು ಮುಖಕ್ಕೆ ಕಟ್ಟಿದ ಬಟ್ಟೆಯನ್ನು ನಿಧಾನವಾಗಿ ತೆಗೆದನು. ಅವನ ಮುಖವನ್ನು ನೋಡುತ್ತಿದ್ದಂತೆ ಕೃಷ್ಣನ ಕಣ್ಣುಗಳು ಆಶ್ಚರ್ಯದಿಂದ ಅರಳಿದವು.
ನಾನು... ಅಜಯ್ ಕುಮಾರ್. ಅನುಳ ಗಂಡ. ಎಲ್ಲರ ಕಣ್ಣಿಗೆ ನಾನು ಸತ್ತಿದ್ದೇನೆ, ಆದರೆ ನಾನು ಬದುಕಿದ್ದೇನೆ. ನನ್ನ ಸಾವಿನ ನಾಟಕವನ್ನು ಮಾಡಿದ್ದು ನಾನೇ. ಅನುಳ ಅಣ್ಣ ಮಾಣಿಕ್ನ ಕರಾಳ ಮುಖ ನನಗೆ ಗೊತ್ತಾಗಿತ್ತು. ಈಗ ನಾವು ಒಟ್ಟಾಗಿ ಆ ರಹಸ್ಯವನ್ನು ಬೇಧಿಸಬೇಕು. ಅನುಳನ್ನು ಉಳಿಸಲು ನೀನು ನನಗೆ ಸಹಾಯ ಮಾಡಬೇಕು.ಕೃಷ್ಣ ತನ್ನ ಪ್ರೀತಿಯನ್ನು ಉಳಿಸಬೇಕೆಂದಿದ್ದ ಹುಡುಗಿಯೇ ಬದುಕಿದ್ದಳು, ಆದರೆ ಅವಳ ಗಂಡ ಸತ್ತಿರಲಿಲ್ಲ.
ಕನ್ನಡಿ ಮನೆಯ ಹೊರಭಾಗದಲ್ಲಿ, ಕೃಷ್ಣನ ಎದುರಿಗೆ ನಿಂತಿದ್ದ ವ್ಯಕ್ತಿಯನ್ನು ನೋಡಿದಾಗ ಅವನ ಹೃದಯದ ಬಡಿತವೇ ನಿಂತುಹೋಯಿತು. ಅದು ಅನುಳ ಗಂಡ – ಅಜಯ್ ಕುಮಾರ್. ಸತ್ತುಹೋಗಿದ್ದಾನೆ ಎಂದು ನಂಬಿದ್ದ ವ್ಯಕ್ತಿ ಜೀವಂತವಾಗಿ, ಕೃಷ್ಣನ ಮುಂದೆಯೇ, ಆ ಅನಾಮಿಕ ಧ್ವನಿಯಲ್ಲಿ ಮಾತನಾಡುತ್ತಿದ್ದನು. ಆಘಾತ, ಅನುಮಾನ ಮತ್ತು ಗೊಂದಲಗಳ ಸುಳಿಯಲ್ಲಿ ಕೃಷ್ಣ ಸಿಲುಕಿದ.
ಅ...ಅಜಯ್? ನೀನು ಜೀವಂತವಾಗಿದ್ದೀಯಾ? ಹಾಗಾದರೆ ಆ ಅಪಘಾತ ಕೃಷ್ಣನಿಗೆ ಸರಿಯಾಗಿ ಮಾತು ಬರುತ್ತಿರಲಿಲ್ಲ.
ಅಜಯ್ ತಡಮಾಡದೆ ಕೃಷ್ಣನ ಭುಜ ಹಿಡಿದು, ಮಾತನಾಡಲು ಸಮಯವಿಲ್ಲ, ಕೃಷ್ಣ ಮಾಣಿಕ್ನ ಕಡೆಯವರು ನಮ್ಮನ್ನು ಹಿಂಬಾಲಿಸಿಕೊಂಡು ಇಲ್ಲಿಗೆ ಬಂದಿದ್ದಾರೆ. ಅವರು ನಿನ್ನನ್ನು ನೋಡಿದ್ದಾರೆ. ಮೊದಲು ಇಲ್ಲಿಂದ ತಪ್ಪಿಸಿಕೊಳ್ಳಬೇಕು. ನಾನು ನಿನಗೆ ಎಲ್ಲವನ್ನೂ ವಿವರಿಸುತ್ತೇನೆ," ಎಂದು ಒತ್ತಾಯಿಸಿದನು. ಕ್ಷಣಾರ್ಧದಲ್ಲಿ, ಅಜಯ್ ಕೃಷ್ಣನನ್ನು ಪಕ್ಕದ ಪೊದೆಗಳ ಹಿಂದೆ ಎಳೆದುಕೊಂಡು ಹೋದ. ಮಾಣಿಕ್ನ ಗುಂಡಾಗಳು ಕನ್ನಡಿ ಮನೆಯ ಬಾಗಿಲಿನ ಬಳಿ ಬಂದಿರುವುದು ಅವರ ಕಿವಿಗೆ ಕೇಳಿಸಿತು. ಅಜಯ್ ಈ ಪ್ರದೇಶದ ಪ್ರತಿಯೊಂದು ಇಂಚನ್ನೂ ತಿಳಿದಿರುವಂತೆ, ಕೃಷ್ಣನನ್ನು ಸ್ಥಳೀಯ ರೈಲ್ವೇ ಹಳಿಯ ಬಳಿಯಿದ್ದ ಒಂದು ಕಿರಿದಾದ ಸುರಂಗದೊಳಗೆ ಕರೆದುಕೊಂಡು ಹೋದ. ಸುರಂಗದ ಕತ್ತಲೆಯಲ್ಲಿ ಉಸಿರಾಡುತ್ತಿರುವಾಗ, ಕೃಷ್ಣನ ಕೋಪ ಸ್ಫೋಟಿಸಿತು. ಯಾರು ನೀನು? ನನ್ನನ್ನು ಪ್ರೀತಿಸಿದವಳ ಗಂಡ ನೀನು ನೀನು ಸತ್ತು ಹೋದ ನಂತರ ನಾನು ಅವಳನ್ನು ಪ್ರೀತಿಸಿದೆ. ನೀನು ಜೀವಂತವಾಗಿದ್ದರೂ ಏಕೆ ಅವಳಿಂದ ದೂರವಿದ್ದೀಯಾ? ಏಕೆ ಈ ನಾಟಕ?
ಅಜಯ್ ಕೃಷ್ಣನ ತೋಳಿನ ಗಾಯಕ್ಕೆ ಕೈ ಹಾಕಿ, ನನಗೆ ನೋವು ಗೊತ್ತು, ಕೃಷ್ಣ. ಆದರೆ ಅನುಳ ಜೀವ ಉಳಿಸಲು ಈ ನಾಟಕ ಅನಿವಾರ್ಯವಾಗಿತ್ತು. ನನ್ನ ಹೆಂಡತಿಯ ಜೀವ ರಕ್ಷಣೆಯ ವಿಷಯದಲ್ಲಿ ನನ್ನ ಪ್ರೀತಿಯನ್ನು ಪರೀಕ್ಷಿಸಿದ ಏಕೈಕ ವ್ಯಕ್ತಿ ನೀನು. ನಿನ್ನ ಪ್ರೀತಿ ನಿಜವಾಗಿಯೂ ದೃಢವಾಗಿದೆ. ಅದಕ್ಕಾಗಿಯೇ ನಾನು ಆ ಬಾರ್ನಲ್ಲಿ ಕರೆ ಮಾಡಿ ನಿನ್ನನ್ನು ಎಚ್ಚರಿಸಿದೆ. ನಾನು ನಿನ್ನ ಶತ್ರುವಲ್ಲ, ನಮ್ಮ ಗುರಿ ಒಂದೇ ಅನುಳನ್ನು ಉಳಿಸುವುದು ಮತ್ತು ಮಾಣಿಕ್ನ ರಹಸ್ಯವನ್ನು ಬೇಧಿಸುವುದು.
ಅಜಯ್ ತನ್ನ ಸಾವಿನ ನಾಟಕದ ಬಗ್ಗೆ ಸಂಕ್ಷಿಪ್ತವಾಗಿ ವಿವರಿಸಿದ. ಮಾಣಿಕ್ ನನ್ನನ್ನು ಸಾಯಿಸಲು ಸಂಚು ರೂಪಿಸಿದ್ದ. ನನ್ನನ್ನು ಅಪಘಾತದ ಹೆಸರಿನಲ್ಲಿ ಕೊಲ್ಲುವ ಯೋಜನೆ ಇತ್ತು. ಆದರೆ ನನಗೆ ಒಂದು ದಿನ ಮುಂಚೆಯೇ ಆ ವಿಷಯ ಗೊತ್ತಾಯಿತು. ನಾನು ಆ ಅಪಘಾತದ ಸ್ಥಳದಿಂದ ಪಾರಾಗಿ ನನ್ನ ಸಾವಿನ ನಾಟಕವಾಡಿದೆ. ನಾನೀಗ ಮಾಣಿಕ್ನ ಶತ್ರು ಆಗಿ ರಹಸ್ಯವಾಗಿ ಕೆಲಸ ಮಾಡುತ್ತಿದ್ದೇನೆ. ಮಾಣಿಕ್ನ ವ್ಯವಹಾರಗಳು ಕೇವಲ ಹಣಕ್ಕಾಗಿ ಅಲ್ಲ, ಅವು ಅಂತಾರಾಷ್ಟ್ರೀಯ ಮಟ್ಟದ ದೊಡ್ಡ ಡ್ರಗ್ ಡೀಲ್ಗಳು ಮತ್ತು ಕಳ್ಳಸಾಗಣೆಯ ಜಾಲ. ಅವಳ ರಕ್ಷಣೆಗಾಗಿ ನಾವು ಇಬ್ಬರೂ ಸತ್ತಿದ್ದೇವೆ ಎಂದು ನಂಬಿಸುವುದು ಮುಖ್ಯವಾಗಿತ್ತು.
ಕೃಷ್ಣನ ಕೋಪ ಈಗ ಶಾಂತವಾಗಿ, ಆಶ್ಚರ್ಯ ಮತ್ತು ದೃಢ ಸಂಕಲ್ಪಕ್ಕೆ ತಿರುಗಿತು. ಅಜಯ್ನ ಈ ತ್ಯಾಗಪೂರ್ಣ ನಿರ್ಧಾರಕ್ಕೆ ಅವನು ಬೆರಗಾದನು. ಹಾಗಾದರೆ ಅನು ಎಲ್ಲಿದ್ದಾಳೆ?
ನಾನು ಅವಳನ್ನು ಅತ್ಯಂತ ಸುರಕ್ಷಿತ ಜಾಗದಲ್ಲಿ ಇಟ್ಟಿದ್ದೇನೆ. ಅಲ್ಲಿಗೆ ಯಾರೂ ಹೋಗಲು ಸಾಧ್ಯವಿಲ್ಲ. ಆದರೆ ನಮಗೆ ಮೊದಲು ಮಾಣಿಕ್ನನ್ನು ಅವನ ಜಾಲದಿಂದ ಹೊರಗೆಳೆಯಬೇಕು. ಅದಕ್ಕಾಗಿ ನಮಗೆ ಒಂದು ಮುಖ್ಯ ಅಸ್ತ್ರ ಬೇಕು. ಆ ಮೆಮೊರಿ ಚಿಪ್.
ಕೃಷ್ಣ ತಕ್ಷಣ ಕನ್ನಡಿ ಮನೆಯಿಂದ ತಂದಿದ್ದ ಮೆಮೊರಿ ಚಿಪ್ ಅನ್ನು ಅಜಯ್ಗೆ ಕೊಟ್ಟ. ಅಜಯ್ ಅದನ್ನು ತನ್ನ ಜೇಬಿನಿಂದ ತೆಗೆದ ಒಂದು ಪುಟ್ಟ ಸಾಧನಕ್ಕೆ ಹಾಕಿ, ಅದರೊಳಗಿನ ಡೇಟಾವನ್ನು ನೋಡಿದ.
ಅಜಯ್ನ ಕಣ್ಣುಗಳು ತೀವ್ರವಾಗಿ ಬದಲಾದವು.ಇದು ಕೇವಲ ಸುಳಿವಲ್ಲ, ಕೃಷ್ಣ ಇದು ಮಾಣಿಕ್ನ ಮುಂದಿನ ದೊಡ್ಡ ರಹಸ್ಯ ಡೀಲ್ನ ಸಂಪೂರ್ಣ ಮಾಹಿತಿ. ಆತ ಒಂದು ಕಡೆ ಚಿನ್ನ ಮತ್ತು ಡ್ರಗ್ಗಳನ್ನು ಬದಲಾಯಿಸುತ್ತಿದ್ದಾನೆ. ಕೃಷ್ಣ, ನಾವು ಸಮಯಕ್ಕೆ ಸರಿಯಾಗಿ ಆ ಜಾಗ ತಲುಪಬೇಕು. ಈ ಮೆಮೊರಿ ಚಿಪ್ನಿಂದಲೇ ನಾವು ಅವನನ್ನು ಪೊಲೀಸರಿಗೆ ಒಪ್ಪಿಸಲು ಸಾಧ್ಯ. ಆದರೆ ಆ ಡೀಲ್ ನಡೆಯುವ ಸ್ಥಳ ಅಜಯ್ನ ಧ್ವನಿ ನಡುಗಿತು.
ಅಜಯ್ ಚಿಪ್ ಅನ್ನು ಕೃಷ್ಣನಿಗೆ ಕೊಟ್ಟು, ಈ ಚಿಪ್ ಅನ್ನು ಸುರಕ್ಷಿತವಾಗಿ ಇಟ್ಟುಕೋ. ಮಾಣಿಕ್ನ ಜನರು ಈಗ ನಿನ್ನನ್ನು ಮತ್ತು ನನ್ನನ್ನು ಒಂದೇ ಎಂದು ಭಾವಿಸುತ್ತಾರೆ. ನಾವು ಒಟ್ಟಾಗಿ ಕೆಲಸ ಮಾಡಬೇಕು," ಎಂದು ಹೇಳಿದನು.
ಮುಂದಿನ ಅಧ್ಯಾಯದಲ್ಲಿ ನೋಡೋಣ
