ನಗರದ ಗದ್ದಲದಿಂದ ದೂರವಿದ್ದ ಆ ನ್ಯೂರೋ ಲ್ಯಾಬ್ ಮೌನವಾಗಿತ್ತು. ಅಲ್ಲಿನ ಗಾಳಿಯಲ್ಲಿ ಅರಿಶಿನದ ವಾಸನೆಯ ಬದಲು ಕೆಮಿಕಲ್ ಮತ್ತು ಎಲೆಕ್ಟ್ರಾನಿಕ್ ಉಪಕರಣಗಳ ಒಂದು ವಿಚಿತ್ರ ವಾಸನೆಯಿತ್ತು. ಡಾ. ಸಮರ್ಥ್ ಕಳೆದ ಹತ್ತು ವರ್ಷಗಳಿಂದ ಮನುಷ್ಯನ ಪ್ರಾಮಾಣಿಕತೆಯನ್ನು ಅಳೆಯುವ ಯಂತ್ರದ ಮೇಲೆ ಕೆಲಸ ಮಾಡುತ್ತಿದ್ದರು. ಅವರ ಸಿದ್ಧಾಂತ ಸರಳವಾಗಿತ್ತು ಮಾತುಗಳು ಸುಳ್ಳು ಹೇಳಬಲ್ಲವು, ಆದರೆ ಜೀವಕೋಶಗಳು ಸತ್ಯವನ್ನೇ ಉಸಿರಾಡುತ್ತವೆ.
ಅವರ ಮುಂದೆ ಇದ್ದ ಸ್ಕ್ರೀನ್ ಮೇಲೆ ಮನುಷ್ಯನ ಮೆದುಳಿನ ತರಂಗಗಳು ನಿರಂತರವಾಗಿ ಚಲಿಸುತ್ತಿದ್ದವು. ಅದು ಕೇವಲ ಚಿತ್ರವಾಗಿರಲಿಲ್ಲ ಅದು ಮನುಷ್ಯನ ಅಂತರಾತ್ಮದ ನಕ್ಷೆಯಾಗಿತ್ತು. ಸಮರ್ಥ್ ಅವರು ಅಭಿವೃದ್ಧಿಪಡಿಸಿದ ಸಾಫ್ಟ್ವೇರ್ The Shadow Reality, ವ್ಯಕ್ತಿಯ ಕಣ್ಣಿನ ಪಾಪೆಗಳ ಅತಿಸೂಕ್ಷ್ಮ ಕಂಪನಗಳನ್ನು ಅಂದರೆ Micro-tremors ನ್ನು ಅಳೆದು, ಅವರ ಸುಪ್ತ ಮನಸ್ಸಿನಲ್ಲಿ ಅಡಗಿರುವ ಕ್ರೂರತೆಯನ್ನು ಕಪ್ಪು ಮತ್ತು ಬಿಳಿ ಬಣ್ಣಗಳಲ್ಲಿ ಬಿಂಬಿಸುತ್ತಿತ್ತು.
ಒಂದು ಮಳೆಯ ರಾತ್ರಿ, ಲ್ಯಾಬ್ನ ಬಾಗಿಲು ತಟ್ಟಿತು. ಬಂದವರು ಈ ನಗರದ ಅತ್ಯಂತ ಗೌರವಾನ್ವಿತ ವ್ಯಕ್ತಿ, ಸಮಾಜ ಸೇವಕ ವಿಶ್ವನಾಥ್ ಬಿಳಿ ಕುರ್ತಾ, ಮುಖದಲ್ಲಿ ಸದಾ ನೆಲೆಸಿರುವ ಶಾಂತ ಮಂದಹಾಸ, ಮತ್ತು ಕಣ್ಣಿನಲ್ಲಿ ಎಲ್ಲರನ್ನೂ ಸಮಾಧಾನಪಡಿಸುವಂತಹ ಕರುಣೆ. ಅವರನ್ನು ನೋಡಿದ ಯಾರಿಗಾದರೂ ಅವರು ಅಹಿಂಸಾವಾದಿ ಎಂದೇ ಅನಿಸುತ್ತಿತ್ತು.
ವಿಶ್ವನಾಥ್ ಅವರ ಮಗಳು ಅನ್ವಿತಾ ಮೂರು ತಿಂಗಳ ಹಿಂದೆ ನಾಪತ್ತೆಯಾಗಿದ್ದಳು. ಪೊಲೀಸರು ಅವಳಿಗಾಗಿ ಹುಡುಕುತ್ತಿದ್ದರು, ಆದರೆ ಸಮಾಜದ ಒಂದು ವರ್ಗ ವಿಶ್ವನಾಥ್ ಅವರ ಮೇಲೆಯೇ ಸಂಶಯದ ಬೆರಳು ತೋರಿಸುತ್ತಿತ್ತು.
ಡಾಕ್ಟರ್, ನಾನು ಸೋತು ಹೋಗಿದ್ದೇನೆ ವಿಶ್ವನಾಥ್ ಅವರ ಧ್ವನಿ ನಡುಗುತ್ತಿತ್ತು. ನನ್ನ ಮಗಳಿಲ್ಲದ ನೋವು ಒಂದು ಕಡೆಯಾದರೆ, ಈ ಜಗತ್ತು ನನ್ನನ್ನು ರಾಕ್ಷಸನಂತೆ ನೋಡುತ್ತಿರುವುದು ಇನ್ನೊಂದು ಕಡೆ. ನನ್ನ ಮೇಲೆ ಎಷ್ಟೋ ಸುಳ್ಳು ಆರೋಪಗಳು. ದಯವಿಟ್ಟು ನಿಮ್ಮ ಈ ವಿಜ್ಞಾನದ ಮೂಲಕ ನನ್ನನ್ನು ಪರೀಕ್ಷಿಸಿ. ನಾನು ನಿರ್ದೋಷಿ ಎಂದು ಜಗತ್ತಿಗೆ ಸಾರಲು ಸಹಾಯ ಮಾಡಿ.
ಸಮರ್ಥ್ ಅವರಿಗೆ ಆ ಕಣ್ಣೀರಿನ ಹಿಂದೆ ಏನೋ ಅಡಗಿದೆ ಅನ್ನಿಸಿತು. ಅವರು ವಿಶ್ವನಾಥ್ ಅವರನ್ನು ಆ ವಿಶೇಷ ನ್ಯೂರೋ-ಚೇರ್'ನಲ್ಲಿ ಕುಳ್ಳರಿಸಿದರು. ಅವರ ತಲೆಗೆ ಮತ್ತು ಕುತ್ತಿಗೆಯ ನರಗಳಿಗೆ ಸಣ್ಣ ಸಣ್ಣ ಸೆನ್ಸರ್ಗಳನ್ನು ಜೋಡಿಸಲಾಯಿತು.
ವಿಶ್ವನಾಥ್ ಅವರೇ, ಈಗ ಕಣ್ಣು ಮುಚ್ಚಿ. ನಿಮ್ಮ ಮಗಳ ನೆನಪುಗಳನ್ನು ಮಾತ್ರ ತಂದುಕೊಳ್ಳಿ ಸಮರ್ಥ್ ಆಜ್ಞಾಪಿಸಿದರು.
ವಿಶ್ವನಾಥ್ ಮಾತನಾಡಲು ಶುರು ಮಾಡಿದರು. ಅವಳು ನನ್ನ ಪ್ರಾಣ ಡಾಕ್ಟರ್. ಅವಳು ಸಣ್ಣವಳಿದ್ದಾಗ ಪಾರ್ಕ್ನಲ್ಲಿ ಆಟವಾಡುತ್ತಿದ್ದ ಆ ದಿನಗಳು ಇಂದಿಗೂ ಹಸಿರಾಗಿವೆ. ಅವಳಿಗೆ ಇಷ್ಟವಾದ ಆ ಕೆಂಪು ಬಣ್ಣದ ಗೊಂಬೆಯನ್ನು ನಾನು ಇಂದಿಗೂ ಅವಳ ರೂಮಿನಲ್ಲಿ ಹಾಗೆಯೇ ಇಟ್ಟಿದ್ದೇನೆ. ಅವಳು ಬರುತ್ತಾಳೆ ಎಂಬ ನಂಬಿಕೆ ನನಗಿದೆ. ವಿಶ್ವನಾಥ್ ಅವರ ಮಾತುಗಳು ಕಲ್ಲನ್ನೂ ಕರಗಿಸುವಂತಿದ್ದವು. ಆದರೆ, ಸ್ಕ್ರೀನ್ ಮೇಲೆ ಕಾಣುತ್ತಿದ್ದ ಡೇಟಾ ಬೇರೆಯದೇ ಕಥೆ ಹೇಳುತ್ತಿತ್ತು. ಅವರ ಮೆದುಳಿನ Frontal Lobe ಅಂದರೆ ಯೋಜನೆ ಮತ್ತು ಸೃಷ್ಟಿಯ ಕೇಂದ್ರ ಅತಿಯಾಗಿ ಕೆಲಸ ಮಾಡುತ್ತಿತ್ತು. ಇದರರ್ಥ ಅವರು ನೆನಪುಗಳನ್ನು ಮರುಪಡೆಯುತ್ತಿಲ್ಲ ಬದಲಿಗೆ ಕಥೆಯನ್ನು 'ಸೃಷ್ಟಿಸುತ್ತಿದ್ದಾರೆ ಎಂದು.
ಅನ್ವಿತಾ ನಾಪತ್ತೆಯಾದ ಆ ಕೊನೆಯ ರಾತ್ರಿ ಅವಳಿಗೂ ನಿಮಗೂ ಜಗಳವಾಗಿತ್ತೇ? ಸಮರ್ಥ್ ನೇರವಾಗಿ ಕೇಳಿದರು.
ವಿಶ್ವನಾಥ್ ಅವರ ಮುಖದಲ್ಲಿ ಒಂದು ಕ್ಷಣ ನಗು ಮಾಯವಾಗಿ ಆತಂಕ ಮೂಡಿತು. ಇಲ್ಲ ಡಾಕ್ಟರ್, ನಾವು ಪ್ರೀತಿಯಿಂದ ಊಟ ಮಾಡಿದೆವು. ನಂತರ ಅವಳು ರೂಮಿಗೆ ಹೋದಳು, ಬೆಳಿಗ್ಗೆ ನೋಡಿದಾಗ ಅಲ್ಲಿರಲಿಲ್ಲ.
ಸಮರ್ಥ್ ಸದ್ದಿಲ್ಲದೆ ಸಾಫ್ಟ್ವೇರ್ನ Dark Mode ನ್ನು ಆನ್ ಮಾಡಿದರು. ಇದು ಮನುಷ್ಯನ ಸಮಾಜಕ್ಕೆ ತೋರಿಸದ ಆ ಕರಾಳ ಆಲೋಚನೆಗಳನ್ನು ವಿಶ್ಲೇಷಿಸುವ ಹಂತ.
ಸ್ಕ್ರೀನ್ ಮೇಲೆ ವಿಶ್ವನಾಥ್ ಅವರ ಮುಖದ ಮೇಲೆ ಒಂದು ಕಪ್ಪು ನೆರಳು ಆವರಿಸತೊಡಗಿತು. ಅವರ ಮಿದುಳಿನ Amygdala ಅಂದರೆ ಭಯ ಮತ್ತು ಹಗೆತನದ ಕೇಂದ್ರ ಜ್ವಾಲಾಮುಖಿಯಂತೆ ಸ್ಪೋಟಗೊಳ್ಳುತ್ತಿತ್ತು. ನ್ಯೂರೋಸೈನ್ಸ್ ಪ್ರಕಾರ, ಒಬ್ಬ ಮನುಷ್ಯ ನಿಜವಾಗಿಯೂ ಪ್ರೀತಿಸುವ ವ್ಯಕ್ತಿಯ ಬಗ್ಗೆ ಯೋಚಿಸುವಾಗ ಮೆದುಳಿನಲ್ಲಿ ಆಕ್ಸಿಟೋಸಿನ್ ಬಿಡುಗಡೆಯಾಗಬೇಕು. ಆದರೆ ವಿಶ್ವನಾಥ್ ಅವರ ಮೆದುಳಿನಲ್ಲಿ ಕೋರ್ಟಿಸೋಲ್ ಅಂದರೆ ಒತ್ತಡದ ಹಾರ್ಮೋನ್ ಮತ್ತು ಅಡ್ರಿನಾಲಿನ್ ಏರುತ್ತಿತ್ತು.
ವಿಶ್ವನಾಥ್ ಅವರೇ, ಆ ರಾತ್ರಿ ಅವಳು ಕುಡಿದ ಆ ಹಾಲಿನ ಗ್ಲಾಸ್ ಅದರಲ್ಲಿ ಏನಾದರೂ ಬೆರೆಸಿದ್ದೀರಾ? ಸಮರ್ಥ್ ತಣ್ಣಗೆ ಕೇಳಿದರು.
ಇಡೀ ಲ್ಯಾಬ್ ಮೌನವಾಯಿತು. ವಿಶ್ವನಾಥ್ ಅವರ ಕಣ್ಣಿನ ಪಾಪೆಗಳು ಇದ್ದಕ್ಕಿದ್ದಂತೆ ಸಂಕುಚಿತಗೊಂಡವು ಅಂದರೆ Pupil Constriction ಇದು ಅತಿಯಾದ ಅಪರಾಧ ಪ್ರಜ್ಞೆ ಅಥವಾ ಸಿಕ್ಕಿಬೀಳುವ ಭಯದ ಸಂಕೇತ.
ಸ್ಕ್ರೀನ್ ಮೇಲೆ ಈಗ ವಿಶ್ವನಾಥ್ ಅವರ ರಿಯಲ್ ಫೇಸ್ ಮೂಡಿತು. ಆ ಪ್ರಶಾಂತ ಮುಖದ ಹಿಂದೆ ಒಬ್ಬ ಕ್ರೂರಿ ಅಡಗಿದ್ದ. ಅನ್ವಿತಾ ತಾನು ಇಷ್ಟಪಟ್ಟ ವ್ಯಕ್ತಿಯ ಜೊತೆ ಹೋಗಲು ನಿರ್ಧರಿಸಿದ್ದಳು. ವಿಶ್ವನಾಥ್ ಅವರಿಗೆ ತನ್ನ ಸಮಾಜ ಸೇವಕ ಎಂಬ ಇಮೇಜ್ ಮತ್ತು ಕುಟುಂಬದ ಗೌರವವೇ ಮುಖ್ಯವಾಗಿತ್ತು. ಮಗಳಿಗಿಂತ ತನ್ನ ಅಹಂಕಾರ ದೊಡ್ಡದಾಗಿತ್ತು. ಆ ರಾತ್ರಿ ಗೌರವ ಉಳಿಸಿಕೊಳ್ಳಲು ಅವರು ಮಗಳನ್ನೇ ಬಲಿಕೊಟ್ಟಿದ್ದರು. ನೀವು ಅವಳನ್ನು ಕೊಂದಿಲ್ಲ ವಿಶ್ವನಾಥ್, ನೀವು ನಿಮ್ಮ ಇಮೇಜ್ ಅನ್ನು ಕಾಪಾಡಿಕೊಳ್ಳಲು ಅವಳನ್ನು ಸಂಹರಿಸಿದ್ದೀರಿ ನಿಮ್ಮ ಮೆದುಳು ಇದನ್ನು ಕೊಲೆ ಎಂದು ಒಪ್ಪುತ್ತಿಲ್ಲ, ಅದನ್ನು ಒಂದು ಅನಿವಾರ್ಯತೆ ಎಂದು ನಂಬುತ್ತಿದೆ ಸಮರ್ಥ್ ಎದ್ದು ನಿಂತು ಹೇಳಿದರು.
ವಿಶ್ವನಾಥ್ ಈಗ ನಟಿಸುವುದನ್ನು ಬಿಟ್ಟರು. ಅವರ ಮುಖ ವಿಕಾರವಾಯಿತು. "ಸಮಾಜ ನನಗೆ ಬೆಲೆ ಕೊಟ್ಟಿದ್ದು ನನ್ನ ಈ ಬಿಳಿ ಬಟ್ಟೆಗಾಗಿ ಡಾಕ್ಟರ್. ಅವಳು ಆ ಬಟ್ಟೆಗೆ ಕಲೆ ಹಚ್ಚಲು ಹೊರಟಿದ್ದಳು. ಕಣ್ಣಿಗೆ ಕಾಣದ ಸತ್ಯ ಯಾರಿಗೂ ತಿಳಿಯುವುದಿಲ್ಲ ಅಂದುಕೊಂಡಿದ್ದೆ.
ಸಮರ್ಥ್ ಕಿಟಕಿ ಆಚೆ ನೋಡುತ್ತಾ ಹೇಳಿದರು, ಕಣ್ಣಿಗೆ ಕಾಣುವ ಸತ್ಯವನ್ನು ಜಗತ್ತು ನಂಬಬಹುದು. ಆದರೆ ನಿಮ್ಮ ನರಮಂಡಲಕ್ಕೆ ಅಂದರೆ Nervous System ಗೆ ಸುಳ್ಳು ಹೇಳಲು ಬರುವುದಿಲ್ಲ. ನೀವು ಮಗಳನ್ನು ಕೊಂದ ಆ ಕ್ಷಣದಲ್ಲಿ ನಿಮ್ಮ ಮೆದುಳಿನಲ್ಲಿ ಉಂಟಾದ ಆ 'ನರಗಳ ಸಂಘರ್ಷ ಇನ್ನೊಂದು ರೀತಿಯಲ್ಲಿ ಹೇಳುವುದಾದರೆ Neural Conflict ಇಂದಿಗೂ ನಿಮ್ಮ ಸುಪ್ತ ಮನಸ್ಸಿನಲ್ಲಿ ಜೀವಂತವಾಗಿದೆ. ಆ ಸತ್ಯವೇ ನಿಮ್ಮ ಅಸಲಿ ಮುಖ.
ಬೆಳಿಗ್ಗೆಯ ಹೊತ್ತಿಗೆ ವಿಶ್ವನಾಥ್ ಸಮಾಜದ ಮುಂದೆ ಮತ್ತೆ ಅದೇ ಬಿಳಿ ಕುರ್ತಾದಲ್ಲಿ ಹೊರಬಂದರು. ಆದರೆ ಲ್ಯಾಬ್ನಿಂದ ಹೊರಬರುವಾಗ ಅವರ ಹೆಜ್ಜೆಗಳಲ್ಲಿ ಮೊದಲಿನ ಆತ್ಮವಿಶ್ವಾಸವಿರಲಿಲ್ಲ. ಸೈನ್ಸ್ ಅವರ ಮುಖವಾಡವನ್ನು ಹರಿದು ಹಾಕಿತ್ತು.
ಜಗತ್ತು ಯಾರನ್ನಾದರೂ ಅತಿಯಾಗಿ ನಂಬುತ್ತಿದ್ದರೆ, ಅಲ್ಲಿ ಕಾಣದ ಸತ್ಯವೊಂದು ಅಡಗಿರುತ್ತದೆ ಎಂದೇ ಅರ್ಥ. ಸತ್ಯವು ಯಾವಾಗಲೂ ಚೀರುವುದಿಲ್ಲ, ಅದು ಮೌನವಾಗಿ ನಮ್ಮ ಮೆದುಳಿನ ಕತ್ತಲ ಮೂಲೆಗಳಲ್ಲಿ ಕುಳಿತಿರುತ್ತದೆ. ಅದನ್ನು ನೋಡಲು ಕಣ್ಣುಗಳಿಗಿಂತ ಹೆಚ್ಚಾಗಿ ವಿಜ್ಞಾನದ ತಾಳ್ಮೆ ಬೇಕು. ಆ ತಾಳ್ಮೆಯಿದ್ದವನಿಗೆ ಮಾತ್ರ ಅಸಲಿ ಮುಖದ ದರ್ಶನವಾಗುತ್ತದೆ.
ಇನ್ನೊಂದು ರೀತಿಯಲ್ಲಿ ಹೇಳುವುದಾದರೆ ಕಣ್ಣಿಗೆ ಕಂಡಿದ್ದನ್ನು ಸತ್ಯ ಎಂದು ನಂಬುವ ಈ ಕಾಲದಲ್ಲಿ ಕಾಣದೇ ಇರುವ ಸತ್ಯವನ್ನು ತಿಳಿಯುವ ಸಾಮರ್ಥ್ಯ ಬೇಕು. ಅದರಲ್ಲೂ ಮುಖ್ಯವಾಗಿ ತಾಳ್ಮೆಯಿರಬೇಕು. ತಾಳ್ಮೆ ಇದ್ದವನು ಮಾತ್ರವೇ ಕಣ್ಣಿಗೆ ಕಾಣದ ಸತ್ಯವನ್ನು ತಿಳಿಯುವ ಸಾಮರ್ಥ್ಯವನ್ನು ಹೊಂದಿರುತ್ತಾನೆ.
